Velkomin heim

Kom loksins heim frá Síberíu síðdegis s.l. föstudag. Því verður ekki neitað að það er einkar viðkunnanlegt þegar flugfreyjan segir þegar vélin er lent ,,Velkomin heim''. Hef það til siðs í vélinni heim að belgja mig út af íslensku vatni, sem er að sjálfsögðu það besta í heimi. Á hinn bóginn eru kartöfluteningarnir með skinkulufsunni sem farþegum er boðið upp á hinn versti kostur. Í hvert sinn sem ég sé þessa helv.... hörmung hvarflar að mér að gerast flugdólgur af verstu sort. Læt mig þó hafa það að éta óskapnaðinn með hálfgerðum hundshaus. Er kannski orðinn góðu vanur eftir flugferðir með tveimur vélum frá Airoflot.

Þar er hægt að velja á milli kjúklings og/eða nautakjöts og fisks. Í forrétt getur maður etið kalda kalkúnabringu með fersku grænmeti, ostur er borinn fram með brauði og smjöri og ávaxtatuffle er svo í eftirrétt ásamt te eða kaffi. Ekki svo afleitur málsverður. Því verður kartöflubixíið hjá Icelandair hálf svona þreytt eftir að hafa fengið það í hverri ferð s.l. þrjú ár. Mál til komið að kokkurinn fari á endurmenntunarnámskeið.

 Er annars að fara að einangra draumahöllina svo hún fái fokheldisvottorð. Ætla mér að klára það af á sem skemmstum tíma náttúrulega. Ekki svo glæsilegt að hafa öll lánin á svimandi háum vöxtum, sem lækka svo þegar húsið er orðið fokhelt og þar með veðhæft. Átta mig ekki alveg á því af hverju hús getur ekki verið veðhæft án þess að það sé orðið fokhelt, því sömu verðmætin hljóta að liggja í þeim framkvæmdum sem búnar eru hvort sem einangrun er komin eða ekki.

 Íslenskir flugvélamatskokkar eru e.t.v. ekki þeir bestu í heimi, en á móti kemur að bankarnir kunna að reikna sér vexti í þágu sömu eigenda að flugfélögum og bönkum.

Athugasemdir

[Rúnar Sveinbjörnsson, 6.11.2007 kl. 20:42]

Í þínum sporum hefði ég beðið með að koma fram yfir byltingarafmælið sem er á morgun. 90 ár, það var ekki annað að sjá á gamlafólkinu í sjónvarinu í gær en að það saknaði gamalla tíma. Hefði verið gaman að sjá þig með rauðan fána á Rauða torginu á Byltingadaginn.

[Jóhannes Ragnarsson, 7.11.2007 kl. 22:43]

Ójá, þeir eru misjafnir blessaðir kokkarnir. Einusinni var ég á bát þar sem matsveinnnn var svo voðalegur, að hásetarnir voru farnir að skipueggja aðgerð, sem fólst í því að grípa karlskrattann, þegar tækifæri gæfist að næturþeli, og fleygja honum út um línurennuna. Það tækifæri kom aldrei. Nú kemur mér til hugar að þessi sami, ljónheppni, kokkur stundi sína eldamennsku hjá Icelandair, farþegum félagsins til ámóta raunar og hásetunum forðum.

Ég verð að taka það fram, til að fyrirbyggja óþarfa grunsemdir og misskilnig, að ég var ekki háseti á umræddum bát og tók því ekki þátt í hinu glæpsamlega ráðabruggi